Die Zauberflöte. Wolfgang Amadeus Mozart.
Oper.
Stadttheater Bern.
Radio DRS-2, Reflexe, 16. Juni 1986.
[Eva Lind als Königin der Nacht]
(Musik)
Ja, sie het's nid breicht, ds höche F. U derby isch sie z Basel der Star gsy. Scho wenn sie uf d Bühni cho isch, het's tumultartige Uftrittsapplaus gä; wenn d Vorstellig sich fertig gsy, hei ganzi Mönschetrube vor ihrer Garderobe uf en es Autogramm oder es Wort vo ihre gwartet; u we sie nächhär i ds italiänische Beizli ihri Spaghetti isch ga habere, hei d Lüt klatschet, we sie zur Tür isch ynecho. Als Callas vo de 80ger Jahr het me sie z Basel agluegt, u d Lüt sy stunde-, ja nächtelang Schlange gstande, für z ghöre, wie sie mit ihrem liechte Sopran d Kolorature vor Wahnsinnsarie het häreträlleret, so liecht, so natürlich, so sicher, wie wenn da ke Mönsch tät singe, sondern es chlyses zarts Vögeli mit grosse schwarzen Augen. No bevor sie isch zwänzgi worde, isch d Eva Lind zum Operestar avanciert. Dass settige Starruhm ou syner Kehrsyte het, isch jetz z Bern uscho, im langsame Bern, wo d Eva Lind immerhin no vor Basel entdeckt und engagiert het, zun ere Zyt, wo me sie no het chönne zahle. Für d "Zauberflöte" het se ds Stadttheater ygsetzt. U natürlich isch niemer meh wäg em Werk i ds Theater, sondern wäg der Lind als Königin der Nacht. Wie's aber so geit, wenn öpper berüehmt isch: es git Problem. Scho nume ar Billetkasse. D Eva Lind singt nämlich nume i füf vo siebe Vorstellige. Drum föh d Lüt scho a, ihres Billet zrügg z gäh, wenn sie merke, dass sie nid singt. U d Fan-Gmeind vo Basel belageret der Vorverkauf u bstellt grad zwänzg oder hundert Billet uf ds Mal. – Wie aber wird e junge Mönsch mit däm Rummel fertig? Wie singt er, wenn er mit sym Gsang nume no muess bestätige, dass er das wärt isch, won er kostet? D Eva Lind het's am Sunntig z Bern verkrampfet. Sie isch nervös uf d Bühni cho, het dergäge akämpft, isch derwäge no verkrampfter worde, u so het sie Müeh übercho mit ihrne Spitzetön, u der letzt het sie du überhoupt nümm troffe. Tröstlich, dass ou Stars am Ändi nume Mönsche sy, u nid Computer. D Fan-Gmeind im 2. u 3. Rang het dewäge genau glych Bravo gschroue u der Eva Lind d Tröji ghalte. Das isch die erfreulichi Syte vom Starkult. Die unerfreulichi liegt dadrinne, dass die glyche Lüt nid gmerkt hei, wie homogen u rund die musikalische Leistige sy usgfalle u wie schön der Papageno u die drei Dame gsunge hei. Da het's de plötzlich nume glängt zum ene Höflichkeitsapplaus. So blind macht äbe d Liebi zur Lind.